Rukhsat howa to aankh mila ker nahen gya...!!!

Rukhsat howa to aankh mila ker nahen gya
Woh kion gya hai yeh bhi bata ker nahen gya
*~*~*~*~*~*~*~*~*~*~*~**~*~*~*~*~*

Woh yoon gya keh bad-e saba yaad aa gai
Ahsaas tuk bhi hum ko dila ker nahen gya
*~*~*~*~*~*~*~*~*~*~*~**~*~*~*~*~*

Yoon lug raha hy jaisy abhi laut aayega
Jaty howy charagh bujha ker nahen gya
*~*~*~*~*~*~*~*~*~*~*~**~*~*~*~*~*

Bus ik lakeer khench gya darmiyan mein
Deewar rasty mein bna ker nahen gya
*~*~*~*~*~*~*~*~*~*~*~**~*~*~*~*~*

Shaa'id woh mil hi jay mager justojoo hy shart
Woh apny naqsh-e paa to mita ker nahen gya
*~*~*~*~*~*~*~*~*~*~*~**~*~*~*~*~*

Gher mein hy aaj tuk wohi khushboo basi hoi
Lagta hy yoon keh jaisy woh aa ker nahen gya
*~*~*~*~*~*~*~*~*~*~*~**~*~*~*~*~*

Tub tuk to phool jaisi hi taza thi us ki yaad
Jub tuk woh patioon ko juda ker nahen gya
*~*~*~*~*~*~*~*~*~*~*~**~*~*~*~*~*

Rehny diya na us ny kisi kaam ka mujhy
Aur khaak mein bhi mujh ko mila ker nahen gya
*~*~*~*~*~*~*~*~*~*~*~**~*~*~*~*~*

Waisi hi be-talab hy abhi meri zindagi
Woh khar-o-khus mein aag lga ker nahen gya
*~*~*~*~*~*~*~*~*~*~*~**~*~*~*~*~*

Shehzad yeh gila hi raha us ki zaat sy
jaty howy woh koi gila ker nahen gya
*~*~*~*~*~*~*~*~*~*~*~**~*~*~*~*~*